დღეს, როცა ბიზნესის წარმატება პირდაპირ კავშირშია მომხმარებლის კმაყოფილებასთან, კომპანიის ხერხემალსა და სახეს, უმეტეს შემთხვევაში, წარმოადგენს გუნდი, რომელიც მათთან პირდაპირ კავშირშია. უფრო ზუსტად კი – მომხმარებელთა მხარდაჭერის გუნდი. შესაბამისად, პირველი კითხვა, რომელიც ჩვენს გონებაში იბადება, არის ის, თუ როგორია კარგი სამომხმარებლო სერვისი, რომელსაც ჩვენს მომხმარებლებს შევთავაზებთ:
კარგი სამომხმარებლო სერვისი ნიშნავს მუდმივად ამართლებდე მომხმარებლის მოლოდინებს. შესაბამისად, მომხმარებელზე ზრუნვის გუნდის მიერ შესრულებული საქმე არის:
- სწრაფი;
- პერსონალიზებული;
- ემპათიის გამომხატველი.
სწორედ ამიტომ, TNET-ის მომხმარებელთა მხარდაჭერის გუნდი, რომელიც 35 ადამიანისგან შედგება დაკომპლექტებულია პროფესიონალებით, რომელთაც კარგად ესმით მომხმარებლის საჭიროებები. მათი მიზანია, თინეთის ციფრულ ეკოსისტემაში შემავალი 10 სხვადასხვა პლატფორმის მომხმარებელს ცხოვრება გაუმარტივონ და მაქსიმალურად კომფორტული მომსახურება შესთავაზონ, რაც საბოლოოდ, აისახება იმ წარმოდგენებსა და შთაბეჭდილებებზე, რომლებიც ადამიანის გონებაში ღრმად ინახება.
„ვფიქრობ, ჩვენი გუნდის თითოეული წევრის საქმიანობა უმნიშვნელოვანესია კომპანიისა და თავად მომხმარებლისთვის. ვინაიდან, სწორედ მომხმარებელთა მხარდაჭერის გუნდი ამყარებს თითოეული პლატფორმის ვიზიტორთან უშუალო კომუნიკაციას, რაც მოითხოვს ძალიან დიდ პასუხისმგებლობას, ყურადღებას და კომპეტენტურობას, იმისათვის, რომ მათი მოთხოვნებიც სრულად დაკმაყოფილდეს და კომპანიისა და ჩვენი კოლეგების მოლოდინებიც გავამართლოთ.“ – ანა როხვაძე, TNET-ის მომხმარებელთა მხარდაჭერის გუნდის ხელმძღვანელი.
რაც მთავარია, გუნდის ამომავალი წერტილი, პირველ რიგში, საუკეთესო სამუშაო გარემოს შექმნაა, რაც გულისხმობს: თანასწორობას, პატივისცემასა და გუნდურობას, რაც ყველაზე რთულ სიტუაციებშიც კი ერთმანეთის უპირობო მხარდაჭერით გამოიხატება.
უფრო მეტიც, გუნდის თითოეულ წევრს სჯერა, რომ ეფექტიანი მუშაობა მხოლოდ იმ შემთხვევაშია შესაძლებელი, თუ ადამიანს თავისი საქმიანობა აბედნიერებს და საკუთარი თავის გამოხატვისა და რეალიზების საშუალებას აძლევს.
„ ჩვენ მუდმივად ორიენტირებულები ვართ გუნდურ მუშაობასა და მეგობრული გარემოს შექმნაზე. შესაბამისად, ჩვენი თითოეული თანამშრომელი მაქსიმალურად ზრუნავს ერთმანეთზე, რათა სამუშაო კომფორტული და სტრესისაგან დაცლილი იყოს. ამის ერთ-ერთი პირდაპირი გამოხატულებაა ის, რომ საჭიროების შემთხვევაში, გუნდის წევრები ნებისმიერ როლს ვირგებთ და ხშირად ნახავთ, რომ ოპერატორის ფუნქციას ითავსებს როგორც თიმ ლიდი, გუნდის ჰედი, ასევე კოორდინატორი. ჩვენი მიზანია, თანამშრომლები გრძნობდნენ, რომ როგორც წარმატების, ასევე გამოწვევების გზაზე, გუნდის თითოეული წევრი ერთად ვართ.“ – ნათია ადეიშვილი, TNET-ის მომხმარებელთა მხარდაჭერის გუნდის კოორდინატორი.
ამიტომაც, გასაკვირი სულაც არ არის, რომ მომხმარებელთა მხარდაჭერის გუნდი მუდმივად აუმჯობესებს იმ ინდიკატორებს, რომლებიც სამუშაოს წარმატებით შესრულებას ასახავს:
- ყოველდღიურად გუნდი პასუხობს შემოსულ 450-500 ზარს და 330-მდე შეტყობინებას სოციალურ ქსელში.
- ქოლცენტრში შემომავალ ზარებზე პასუხის გაცემის საშუალო დრო, 30-35 წამიდან, 20-25 წამამდე შემცირდა.
- ჩათში შემოსული მომართვების პასუხის გაცემის დრო 3-5 წუთს შეადგენს.
ეს მაჩვენებელი კი მაშინ, როცა ქოლცენტრში შემომავალი ზარების რაოდენობა 2022 წელთან შედარებით, 2023 წელს 2068-ით გაიზარდა და 12 044 ზარს მიაღწია.
მნიშვნელოვანია, რომ TNET-ის პლატფორმებზე ვიზიტების რაოდენობაც გაზრდილია და 11 066 714-ს შეადგენს, რაც 605 724-ით მეტია 2022 წელთან შედარებით.
მომხმარებელთა მხარდაჭერის გუნდის მიზანი, შესრულებული საქმიანობის გაუმჯობესებაა, რაც საბოლოოდ, მომხმარებელთა კმაყოფილებასა და ერთგული გამომწერების რიცხვის ზრდაში გამოიხატება.
