ციფრული ორეული, როგორც ამას სახელიც გვიჩვენებს, ფიზიკური ობიექტის ციფრული ვერსიაა, რეპლიკა (შესაძლოა, ტყუპისცალიც ვუწოდოთ), თუმცა ციფრულ ფორმაში. ეს ვირტუალური მოდელები რეალურ, განახლებულ მონაცემთა წყაროს იყენებენ იმისათვის, რომ შექმნან გამოსახულება, რომელიც ავთენტურ ობიექტს მაქსიმალური სიზუსტით იმეორებს, მათ შორის, არა მხოლოდ ვიზუალურად, არამედ ქცევითი ინსაითების კუთხითაც.
სწორედ ამ თვისებების გათვალისწინებით, ციფრული ორეულის შექმნა ნებისმიერი ფიზიკური ობიექტებისთვის შესაძლებელი ხდება. მაგალითად, Google Maps რეალურ დროში არსებულ მონამცემებს დედამიწის ზედაპირის გამოსახულების შესაქმნელად იყენებს და ამ გზით, ჩვენს ყოველდღიურობაში, ფიზიკური რუკის საჭიროებას აქრობს.
ალტერნატიულ შემთხვევაში კი, ამ ტექნოლოგიით შესაძლოა წარმოების ქარხნის ციფრული ორეულის შექმნა, რომელიც საწარმოო ობიექტებს, შესყიდვებსა და მიწოდების ჯაჭვს ასახავს, ან ასევე, შესაძლებელია თავად ინფრასტრუქტურის ორეულის შექმნა, რომელიც ფიზიკურ ინფრასტრუქტურის რეპრეზენტაციაა, მაგალითად, შენობა, სპორტული მოედანი ან გზები.
მნიშვნელოვანია, რომ რა ტიპის ციფრული ორეულის ტექნოლოგიაზეც არ უნდა ვსაუბრობდეთ, მათ მიერ მოწოდებული რეპრეზენტაცია გარემოს ან ობიექტის ციფრული მოდელისთვის კონტექსტის მისაცემად და ასევე, რეალურ ცხოვრებაში პოტენციურად არსებული სცენარების ასახვისათვის გამოიყენება.
როდესაც ციფრული რეპრეზენტაცია რეალურ სამყაროში არსებულ ქცევას იმეორებს, ამ გზით, შესაძლებელია უკეთ გავიგოთ, თუ როგორ შეუძლია ფიზიკურ ობიექტს, პროცესს ან თუნდაც ადამიანს ქცევა და ოპერირება. ეს, თავის მხრივ, ხელს უწყობს დაგეგმვისა და გადაწყვეტილების მიღების ოპტიმიზაციას, რაც მომხმარებლებს უფრო ზუსტ და მოქნილ ოპერაციულ შესაძლებლობებს აძლევს. უფრო ზუსტად, განვიხილოთ რამდენიმე შემთხვევა, როცა ციფრული ორეულის გამოყენება დიდ საზოგადოებრივ სარგებელს ქმნის, მათ შორის, მდგრადი განვითარების კუთხით:
მდგრადობის წახალისება და ეკომეგობრული მიდგომები
ციფრულ ორეულებს მნიშვნელოვანი როლი უკვე არსებულ გარემოში მდგრადობის გასაუმჯობესებლად შეიძლება დავაკისროთ. მაგალითად, ხშირად, ეს ტექნოლოგია პროდუქტის დიზაინის დასახვეწად გამოიყენება, რათა ყოველდღიური მოხმარების, სამრეწველო თუ სამშენებლო ტიპის წარმოებისათვის საჭირო მასალის რაოდენობა შემცირდეს.
ასევე, მისი გამოყენება პროდუქტისა და მასალების ზედამხედველობის გასაუმჯობესებლადაც შესაძლებელია, რათა ნაგავსაყრელებში მოხვედრილი ნარჩენების რაოდენობა შემცირდეს. კერძოდ, ამ ეტაპზე, ციფრული ორეულები უკვე უსარგებლო ნარჩენების რაოდენობას დაახლოებით 20%-ით ამცირებს.
- ენერგიის მონიტორინგი
ციფრული ოერულის სიმულაციის მოდელებს შეუძლიათ აქტივების ან პროცესების მონიტორინგი და ოპტიმიზაცია, მათ შორის, ისეთი მნიშვნელოვანი საკითხების შემთხვევშიც, როგორიცაა ენერგიის მოხმარება, შენარჩუნება და მენეჯმენტი, რასაც ინფორმაციის შეგროვებით ახერხებს.
ამ შეგროვებული მონაცემების გამოყენება, საშუალებას იძლევა შემცირდეს ხარჯები, ენერგიის მოხმარება და შესაბამისად,ნახშირბადის ემისიები, რაც დაგვეხმარება კლიმატის და გარემოს ირგვლივ არსებული გამოწვევების მოგვარებაში.
სამშენებლო სტანდარტებისა და ხარისხის გაუმჯობესება
ციფრული ორეულის ტექნოლოგიისა და რეალურ დროში არსებული აპლიკაციების ერთდროულად გამოყენებას შეუფასებელი ინსაითების შეგროვება შეუძლია, როგორც დიზაინის, ასევე პერფორმანსისა და სხვა ისეთი მნიშვნელოვანი ასპექტების კუთხითაც, რაც დროთა განმავლობაში, სამშენებლო მასალების, პროცესის და ინფრასტრუქურის გაუმჯობესებას შესაძლებელს ხდის. ეს თავის მხრივ, ჭკვიანი შენობების და ზოგადად, ჭკვიანი ქალაქების მშენებლობაზე დადებითად აისახება.
მაგალითად, კონტრაქტორ მშენებელს შეუძლია შეისწავლოს მაცხოვრებელთა ქცევის მოდელები, რათა საცხოვრებელი სივრცე მაქსიმალურად ეფექტურად გამოიყენოს. რაც განსაკუთრებით მნიშვნელოვანია, ასევე შეუძლია წინასწარ გაითვალისწინოს დიზაინის ცვლილებების, ამინდის გართულებებისა თუ უსაფრთხოების ინციდენტების პოტენციური გავლენა, რათა მაქსიმალურად უსაფრთხო, კომფორტული და ენერგოეფექტური გარემო შექმნას.
